Hondarribiko Ahotsak proiektuaren aurkezpena egin dugu

2013ko abe. 4a, 15:06

49 hondarribitar daude elkarrizketatuta Ahotsak proiektuan. Adineko 49 gizon-emakume. Portuarrak, kaletarrak zein baserritarrak. Jostun, errementari, arrantzale, sare konpontzaile, hargin, arrain saltzaile, tabernari, neskame, soinujole, artzain... ibilitakoak. Eskolara gutxi joan ziren arren, bizitzaz asko dakitenak.

Atzo omenaldi xume bat egin zitzaien, Hondarribiko udaletxean. Udalak eta Badihardugu elkarteak antolatuta. Proiektuan parte hartzeagatik eskerrak ematearekin batera, grabazioen kopia bana eman zieten. Eta oso giro polita sortu zen.

2011. urtean egindako elkarrizketak dira gehienak. Handik hona materiala landu, eta Interneten jartzen joan gara. Une honetan, 1.011 pasarte daude identifikatuta eta gaika sailkatuta. Horietatik, 401 bideo pasarte daude sareratuta, Hondarribiko Ahotsak proiektuan ikusgai. Lehengo bizimodua nolakoa zen jakin nahi duten guztientzat eskuragarri.

Karmelo Goikoetxea euskara teknikariak egin zituen aurkezle lanak atzoko ekitaldian. Lehenengo, Aitor Kerejeta alkateak hartu zuen hitza, elkarrizketatuei eskerrak eman eta euskararen erabileraren garrantzia nabarmentzeko. Atzokoa egun aproposa baitzen horretarako: Euskararen Nazioarteko Eguna. Ondoren, Idoia Etxeberriak hitz egin zuen, Ahotsak-eko kideak. Duela bi urte etxez etxe ibili zen, gustura ibili ere, elkarrizketak egiten. Herritarren harrera beroa eta eskuzabaltasuna eskertu zituen atzo.

Kontu "txol interesantiak" kontatu zizkiotela esan zuen Etxeberriak, eta asko ikasi zuela: "Kontatu didate tranbia baserritarrez eta arrain saltzailez lepo joaten zela Irunera. San Pedro kalean sagardotegi mordoa zegoela. Izurdeei segika eta izarrei begira egiten zutela arrantza. Sareak tanatzeak eta josteak zituen lanak. Emakumeek labaderoan arropa garbitzen egiten zituzten ekinaldiak, eskuak izoztuta baina bihotzak bero, Markesaren alaba kantatzen". 

"Dena bekatua zen garai hartan, baina beti aurkitzen zenuten zirrikituren bat dantzarako. Tristurak ahazteko. Gerra ondorenean, gosea nagusi. Baina angulak merkeak ziren orduan eta antxoarik ez zen falta. Beraneanteei lanperna beroak saltzen zizkionik ere bazen. Hori bai, kontrabandoan ere ez zineten makalak! Ondo probesten zenituzten ilargi gabeko gauak. Eta Hendaiara batelean egindako joan-etorriak ere bai, azukrea eta kafea gonazpietan gordetzeko".

Elkarrizketak egin ondoren hildako bost lagunak gogoratu zituzten. Eta lekuko denen testigantzak batzen dituen goiko bideoa ikusi zuten, berariaz aurkezpenerako prestatua. Parte hartzaileei bideoen kopiak banatu ondoren, taldeko argazkia aterata amaitu zen ekitaldia. Elkarrizketatuek ilusio handiarekin jaso zuten ondo merezitako omenaldia.