Urretxu eta Zumarragako Ahotsak proiektuko lekukoei omenaldia
2014ko eka. 13a, 15:58
Atzo, osteguna, Urretxu eta Zumarragako Udalek eta Badihardugu Elkarteak Ahotsak proiektuan parte hartu duten lekukoei omenaldia egin genien Zumarragako Zelai-arizti Kultur etxean. Proiektuaren laburpen gisa prestatutako ikus-entzunezkoaz gozatzeko aukera izan zuten bertaratutakoek.
Zumarragako Zelai-arizti Kultur etxeko areto nagusia goraino bete zen. Urretxu eta Zumarragako Ahotsak eta Euskal Herriko Ahotsak proiektuerako elkarrizketatutako hainbat lekuko bertaratu ziren. Izan ere, eurak izan dira proiektu horien ardatz. Eta eurei esker ona adierazteko egin zen ekitaldia.
2011n hasi zen Badihardugu Elkartearen eta Urretxu eta Zumarragako Udalen arteko elkarlana. Urretxu eta Zumarragako Ahotsak izeneko proiektuaren baitan, hainbat herritar elkarrizketatu genituen, euren bizipenak eta euskara jatorra jasotzeko asmoz. Horretaz gain, beste hainbat proiektutako grabazioak ere katalogatu ditugu Ahotsak.com webgunean: Xabi Lasa filologoak Urretxu eta Zumarragako euskara lanerako egindako grabazioak edo Joxe Manuel Bereziartua "Bere"-k Urola Garaia: mende bat iruditan lanerako egindakoak, esate baterako.
Zumarragako alkate den Mikel Serranok eman zion hasiera ekitaldiari. Ondoren, Urretxu eta Zumarragako grabazioekin prestatutako laburpen-bideoa ikusteko aukera izan genuen:
Bideoaren ostean, Badihardugu Elkarteko ordezkariak labur-labur lan-metodologia azaldu zuen. Giroa berotzeko, herriko bertsolarien eskutik zenbait bertso entzuteko aukera ere izan. Eta, ekitaldia amaitzeko, Oihane Zabaleta Urretxuko alkateak ahozko ondarea biltzearen garrantzia, eta ondare hori ondorengoen esku uztearen garrantzia azpimarratu zuen, behin eta berriz ondare hori utzi digutenei eskerrak emanez.
Bukaeran, txalo artean, lekuko bakoitzari bere grabazio osoa eta aurkezpen-bideoaren kopia eman zitzaizkion. Eskerrik asko guztioi!
Iruzkindu
Erantzuna emateko, sartu ahotsak.eus-eko komunitatera.
