Felix Arkotxa Urkiri

Zeberion jaio zen, Ibarrondo auzoko Etxetxikerra baserrian. Ama Zeberiokoa bertakoa zuen eta aita Orozkoko Urigoitikoa. Zazpi neba-arrebatatik gazteena da Felix. Ibarrondotik Arantzazura joateko oihitura eduki dute beti, errotara eta tranbiara esaterako. Horregatik, ondo baino hobeto ezagutzen du herria. Gero, gainera, Arantzazura ezkondu zen eta harrezkero bertan bizi da. Felix Igorreko maristetan ibili zen mutikotan eta gero Lemoako harrobian eta Firestonen egin izan du behar. Beti eduki izan ditu gustuko ganaduak eta baita ortua ere, horregatik oraindik ere baserriko beharretan ibiltzen da. Andreagaz batera egin genion elkarrizketa, Begoña Landajorekin. Baserriko bizimoduaz, eskolako kontuez, jaiez eta lehengo ohiturez hitz egin genuen eurekin egon ginenean.