Azken hilabeteetan grabazioak egiten jardun ondoren, aste honetan sareratu ditugu Mutrikuko lehenengo grabazioak. Interneten argitaratu ditugun aurreneko lekukoak Joseba Andoni Andonegi eta Gregorio Arreitunandia dira.

Ahotsak.com proiektuan garrantzi berezia ematen diegu teknologia berriei. Ahozko tradizioa eta memoria historikoa bildu, baina teknologia berrien bitartez hedatu. Horixe gakoa. Twitter erabiltzen ere hasi gara.

Ahotsak.com egitasmoak 3 langile behar ditu proiektuan lan egiteko. Hasiera batean urtebeterako kontratua litzateke, baina luzatzeko aukerarekin. Interesatuta daudenek ekainaren 26ra arteko epea dute euren eskaera bidaltzeko.

Euskararen Udal Patronatuak eta Badihardugu Euskara Elkarteak sinatutako hitzarmenari esker, hiriko ahozko ondarea jaso, landu eta zabalduko dute Donostiako Ahotsak izeneko ekimenaren bitartez.

Joan zen asteazkenean Elgetan izan ginen Lostin.tv webguneko lagunekin. ETBrako elkarrizketa bat egin ziguten Ahotsak.com proiektu honen inguruan.

Udaberri Galdua proiektuan 1937ko loreak argitaratzen hasi dira. Berrogeitamar pertsona elkarrizketatu ondoren banaka banaka bideoak editatzen eta argitaratzen hasi dira. Gerra Zibilaren lekukoen aurpegiak, hitzak eta kontakizunak agertzen dira blog pedagogiko horretan. Aurrera ta zorte on!

Mutrikuko Guraso Elkartearen ekimenez, herriko kanta zaharrak biltzen dihardute azken hilabeteetan. Joan zen astean afari-merienda parea ere egin zituzten eta han bildutakoa sarean dago dagoeneko.

UNED Bergara Zentru Elkartuak Internet bidezko "Etnografia: Bizitza-istorioak egin eta hauen azterketa" ikastaroa antolatu du. Ikastaroak ikerkuntza biografiko-narratibo bat egiteko metodologian eta lan tresnetan sakontzea du helburu.

Astelehen arratsaldean GoiTB telebistan izan ginen Ahotsak.com webguneaz hitz egiten. Elgetako proiektuaren aurkezpena aitzakia hartuta, egitasmoaren berri eman genuen: helburuak, orain arteko lana, eta abar.

Joan zen ostiralean, urtarrilaren 23an, aurkeztu zen Elgetako Ahotsak proiektua eta omenaldia egin zitzaien proiektuan parte hartu duten elgetarrei.