Gregorio Larrañaga Mandiola Mañukorta

1943an jaio zen Markina-Xemeingo Larruskain auzoko Mañukorta baserrian. Ama Etxebarrikoa zuen eta aita Mañukortakoa bertakoa. Larruskaingo eskolan ibili zen. Oso buru argikoa izan da beti, baina 5 anai-arrebatan zaharrena izanik, ikasketak ez zituela beharko pentsaturik, 14 urterekin utzi zuen eskola. 1965ean soldadutzara joan behar izan zuen eta 2 urte egin zituen marinan, Canarias gerraontzian. Soldadutzatik bueltan, 1968ko otsailaren 14an, Ameriketara joan zen artzain, 3 urterako kontratu batekin. Guztira 5 urte egin zituen Ameriketan (azken urteak bertako gisa) eta hasieran artzain gisa joan arren, azken urteetan "kanpero" lanetan ere ibili zen. Ameriketatik itzuli zenean Elgoibarko Danobat lantegian hasi zen lanean. Gero Berriatuako Cikautxo lantegira pasa zen eta bertan lan egin zuen erretiroa hartu arte. Mutikotan bertsotarako zaletasun handirik ez zuen arren, pixkanaka hasi zen bertsotan. 1966an, artean soldadutzan zegoela, Bizkaiko bertsolari txapelketan parte hartu zuen. Lea-Artibaiko kanporaketa irabazi ostean, Lekeitioko finalaurrekoan bigarren geratu zen eta Durangoko finaleraino iritsi zen. Hala ere, Ameriketatik itzuli ostean hasi zen plazetan kantatzen. Mugartegi izan omen zuen maisu. Gerora Lazkao Txiki izan zuen sarritan bertsotarako lagun eta azken urteetan Zeberiorekin ibili izan da sarri. Txiste-kontalari gisa ere jardun izan du.