Fernando Alegria Goiri Inpernu

"Inpernu" 1923. urtean sortu zen ezizen bereko etxean, Ugarte auzoko Bidekurtzen. Aita bertakoa zuen eta ama Arrietakoa. Hamar neba-arrebatatik zazpigarrena da bera. Elizaldeko eskolara joan zen 14 urtera arte eta gero Gernika-Lumora joan zen arotz lanbidea ikastera lau bat urtez eta beste 3-4 urtez Bilbora. Gerra sasoian, bere aita herriko lurperatzailea izan zen, gerrako hildakoak-eta lurperatzen. 23 urterekin kamioneta batekin esne-saltzaile hasi zen eta ostean obretan hasi zen kamioi-gidari legez: Gernika-Lumon, Miranda de Ebron eta Valladoliden, besteak beste. 44 urtez ibili da kamioiarekin. Tarte horretan, 1960an hasita, 9 plazadun autoa erosi eta taxilari bezala aritu zen 13-14 urtez astelehenetan eta ezkontza egunetan. Berak izan zuen inguruetan lehenengo autoa, 17.000 pezetako "Plimut" markakoa, eta baita telefonoa ere, garraiolaria zelako jarri zioten telefonoa. Baserrian bizi arren nagusitan hasi da baserriko lanetan; txakolina egiten dute etxean. Bere jaiotetxe ondoko Zizperrene baserriko alabarekin ezkondu zen.