Eskerrik asko Ibilaldiaren antolatzaileei!
2014ko eka. 5a, 15:08
Joan den igandean ilusioz beteta jaso genuen Ibilaldiaren antolatzaileek egindako omena. Sariarekin batera, aurrerantzean ere lanean gogoz jarraitzeko indarra jaso genuen. Mila esker!
Aurtengo Ibilaldia Urdaibaiko biosfera erreserbaren bihotzean ospatu da, Gernika-Lumon. Eta horixe izan du leloa: Euskararen bihozfera. Euskararen Dibertsitatea omendu nahi izan dute antolatzaileek, euskalkien alorrean beharrean ibili diren eta gabiltzan zazpi elkarte edo erakunde omenduz: Euskaltzaindia, Labayru, Mendebalde Kultur Elkartea, Bostak bat Kultur Elkartea eta Adorez hiztegiak, Euskal Kultur Erakundea (EKE), Sü hazia eta Badihardugu Euskara Elkartearen Euskal Herriko Ahotsak proiektua.
Jende andana batu zen Zimela jatetxean, aurtengo Ibilaldiaren omenaldi ekitaldian. Euskalkien alorrean ikerketa lanetan ibilia den Bostak Bat Elkarteko Juan Luis Goikoetxeak egin zuen sarrera-hitzaldia, omendutako talde guztien izenean. Esker ona adierazi zuen eta euskalkiak zaindu beharreko herri ondare oparoa direla gogoratu zuen. Hezkuntza arloan euskalkiek duten hutsunea ere azpimarratu zuen Goikoetxeak.
Goikoetxearen hitzen ostean, omendutako 7 taldeetako ordezkariek saria jaso zuten. Ondoren, Seber-Altube ikastolako kideek Bilboko Harrobia Lanbide Heziketako ikastetxeari pasatu zioten 2015ean Ibilaldia antolatzeko testigua.
Hamaika telebistakoak bertan izan ziren, eta 2014ko Ibilaldiaren inguruko erreportai honetan bildu zituzten omenaldi ekitaldiko hitzak eta irudiak ere:
Badihardugu Elkartearen eta Euskal Herriko Ahotsak proiektuaren izenean, eskerrik asko!
Iruzkindu
Erantzuna emateko, sartu ahotsak.eus-eko komunitatera.
