Pako Iriondo, Euskal Mendizale Federazioaren lehendakari izana, hil da
2014ko ots. 18a, 08:26
Larunbatean, otsailaren 15ean, agur esan zigun Pako Iriondo elgoibartarrak. 1926an jaioa, mendizale amorratua izan zen gaztetatik, eta bera izan zen Euskal Mendizale Federazioaren lehendakari karguan urte gehien egin zituen kidea.
Elgoibarko San Roke (Azkue) bailarako Tokieder etxean jaio zen Pako. Hasiera batean futbolean aritu bazen ere, mendizaletasuna nagusitu zitzaion beste ororen gainetik. Elgoibarko Eup! Mendizale taldeko kide izan zen gaztetan. Eup! taldetik Morkaiko elkartea sortu zuten. Morkaiko Elkartearen eta Euskal Mendizale Federazioaren lehendakari izan zen urte askoan eta izugarrizko lana egin zuen mendizaletasunaren alde. Berak bultzatu zituen Zegama-Aizkorri maratoia eta Zumaiako flysch-eko mendi-lasterketa, esate baterako, eta Pyrenaica aldizkariaren sustatzailea ere izan zen.
Guk ere izan genuen ezagutzeko aukera, Euskal Herriko Ahotsak proiekturako elkarrizketa egin baikenion 2010ean. Hainbat kontu interesgarri kontatu zizkigun. Besteak beste, Eup! taldearekin egindako lehenengo mendi-irteerak gogoratu zituen elkarrizketan:
Kanpoko irteeretara kamioi batean joaten omen ziren, Gobernu Zibilaren salbokonduktoa lortu eta gero:
Euskal mendizaletasunaren historia eta gorabeherak, materialaren bilakaera eta abarri buruz mila azalpen eman zizkigun. Mendi kiroletako lehiakortasuna ere aipatu zuen eta bere euskal mendi kutunenak zeintzuk ziren ere azaldu zigun. Berak lan handia egin zuen euskal mendizaletasunaren alde, eta pena ematen zion sarritan Euskal Herriko mendi paregabeak behar bezala ez baloratzeak:
Gaur, asteartea, emango diote azken agurra, Elgoibarren, bere jaioterrian, arratsaldeko 19:00tan. Eskerrik asko, Pako, bidea zabaltzeagatik.
Iruzkindu
Erantzuna emateko, sartu ahotsak.eus-eko komunitatera.
