Imanol Olaizola Alegria

13 anai-arrebatatik zaharrena izan zen. Azpeitiko maristetan 2. mailako batxilerra ikasi zuen eta eskolok amaitu ostean, notariotzan hasi zen lanean. 23 urte zituela, EAJko Gipuzkoako diputatuen zerrendan ordezkari modura joan zen. Prokuradore ikasten hastekoa zela, gerrak irten zuen. 'El día' eta 'Euzkadi' egunkari abertzaleetako Azpeitiko korrespontsala zen eta horregatik hiru urte kartzelan eman zituen. 1941ean etorri zen Ermura; Sallabenteko Bitxori Mallabiabarrenarekin ezkondu eta hiru seme-alaba izan zituzten. Anaitasuna ikastolako sortzaileetako bat, Loiola Irratiko Ermuko ordezkari, 20 urtez Batzokiko administrari… bere burdindegiko negozioak lagatako denboran inorendako boluntario lana egitea gustatu izan zaio. Ermuan bizi arren, azpeitiarrez hitz egiten du.