Angelita Onaindia Ulazia

Gizaburuagan jaio zen, Lariz-Oleta izeneko okindegian. Aita Iurretakoa zuen, okina, eta ama Lekeition sortua. Bost anai-arrebetan laugarrena zen Angelita; haurdunaldian amak 1918ko gripea izan zuen, baina onik irten ziren biak. 6 urterekin Lekeitioko eskola batean egon zen interna, eta Batxilerra Bilboko Institutuan egin zuen. Ondoren Magisteritza ikasi zuen, eta hainbat lekutan ibili zen eskolak ematen. Bere senarra izango zena, Manuel Gojenola, Amoroton jaio zen, Goiobeaskoa baserrian. 20 urte Argentinan, La Pampan, igaro ostean Euskal Herrira itzuli zen eta orduantxe ezagutu zuten elkar. Ezkondu, eta AEBetako Idaho estatuko Shoshone herrira joan ziren bizitzera. Manu izeneko semea izan zuten bertan. Senarrak hainbat arrantxoren ardura zuen eta Angelita maistra lanetan hasi zen Shoshoneko Institutuan, gaztelania erakusten; han Kelly deitzen zioten. 1965ean itzuli ziren Euskal Herrira (Manu semeak euskara eta ingelesa soilik zekizkien). Bilbon bizi izan ziren. Angelitak ingelesezko eskolak eman zituen, erretiroa hartu arte. Manu semeak 2002-2006 urteen bitartean amari egindako elkarrizketak jaso ditugu hemen.